Сьюзан Г. Комен фонди билан келишув имзоланди

Сьюзан Г. Комен номидаги кўкрак саратонига қарши кураш фонди (The Susan G. Komen Breast Cancer Foundation) 100 минг нафардан ортиқ кўнгиллилар кўмагида бутун дунё бўйлаб аёллар ҳаёти учун кураш олиб боради. 1982 йилда Нэнси Бринкер 36 ёшида кўкрак бези саратони касаллигидан ҳаётдан кўз юмган опаси Сьюзан Ж. Комен хотирасига бағишлаб ушбу фондга асос солади. Мазкур касалликка қарши кураш бўйича халқаро даражада етакчи фондга айланган ушбу ташкилот кўкрак бези саратони соҳасидаги тадқиқотлар учун грантлар ажратиш ҳамда дунё бўйлаб таълимий, илмий ва хайрия дастурларини амалга ошириш орқали ўз вазифаларини амалга оширади. Бўлимлари, яқин ҳамкор ташкилотлар ва ҳомийлар билан биргаликда жамғарма ҳар йили илмий изланишлар, таълим ва скрининг текширувлари дастурлари ва касалликни даволаш учун маблағ ажратади. Ҳозирги кунда фонд 50 дан ортиқ давлатлар билан ҳамкорликни йўлга қўйган. Сьюзан Г. Комен номидаги жамғарма Марказий Осиё мамлакатлари орасида биринчи бўлиб Ўзбекистон билан ҳамкорлик меморандуми имзолади.

Ўз навбатида Ўзбекистонда сўнгги уч йил мобайнида мутахассислар ва жамоатчилик вакиллари, “Ҳаёт учун!” кўкрак бези саратони миллий уюшмаси саъй-ҳаракати билан кўкрак бези саратони ва аёллар репродуктив тизимининг бошқа онкологик касалликларини барвақт аниқлаш, ташхис қўйиш ва даволаш имкониятларини кенгайтириш жараёни фаоллаштирилди. Ҳар йили уюшма аёлларни тиббий-ижтимоий ва руҳий жиҳатдан қўллаб-қувватлашга қаратилган қатор кенгқамровли тадбирларни ўтказиб келмоқда. Хайрия акциялари, концертлар, “Ҳаёт учун!” аёллар ҳамжамиятига йўналтириладиган кимошди савдолари шулар жумласидан бўлиб, уларнинг мақсади кўкрак бези саратони касаллигига жамоатчилик эътиборини қратишдан иборат. “Ҳаёт учун!” хайрия форум марафони уюшманинг энг йирик оммавий лойиҳаси бўлиб, икки йил мобайнида унда республикамиз бўйлаб 38 минг киши иштирок этди.