Криштиану Роналду: «Ўзбекистонга яна қайтаман»

Cўнгги пайтларда юртимизга жаҳон футболи юлдузларининг ташрифи оддий ҳолатга айланиб қолди. Эммануэль Пети билан бошланган ушбу марафон кейинчалик Самуэль Это~О, Сеск Фабрегас, Карлес Пуйоль, Андрес Иньеста Лионель Месси, Хуан Лапорта, Ривалдо, Артур Зико, Луиз Фелипе Сколари, Паоло Мальдини каби мегаюлдузлар билан давом эттирилди.

Ушбу юлдузлар ташрифида «Бунёдкор» футбол клубининг ҳиссаси катта бўлмоқда. Шунингдек, «Ўзбекистон маданияти ва санъати форуми» жамғармаси ҳам бу хайрли ишларга бош-қош бўлмоқда. Мисол тариқасида, «Style.uz-2009» санъат ҳафталиги доирасида Паоло Мальдини, «Янги авлод» фестивалининг тақдирлаш маросимида Самуэль Это~ларнинг Тошкентга ташриф буюрганини келтиришимиз мумкин. Ушбу юлдузлар марафони яна давом этди. Сайёрамизнинг энг қиммат футболчиси, 2008 йилги «Олтин тўп» соҳиби Криштиану Роналду Тошкентга келди.

Роналду ва унга ҳамроҳлик қилаётган инсонлар 22 декабрь куни соат 7:30да Цюрих-Тошкент йўналиши бўйича пойтахтимизга етиб келишди. Бир кун аввал Роналду Швейцариянинг Цюрих шаҳрида ташкил этилган ФИФАнинг йил номинантларини тақдирлаш гала-маросимида иштирок этганди. Унда Криштиану «Бриллиант тўп» соҳиби сифатида эътироф этилган Лионел Мессидан сўнг иккинчи ўринни эгаллади. Бу ҳали ҳаммаси эмас. Сайёрамизнинг 2008 йилдаги энг яхши футболчиси йилнинг энг чиройли голи муаллифига топшириладиган афсонавий венгриялик футболчи Ференц Пушкаш номли совринни ҳам қўлга киритди. Унинг Европа Чемпионлар Лигаси 2008|2009 йилги мавсуми чорак финал жавоб учрашувидаги «Порту» дарвозасига киритган суперголи 2009 йилнинг энг чиройли голи, деб топилди. Эслатиб ўтиш жоиз, Роналду 15 апрель куни муҳташам «Драгау» стадионида кечган учрашувнинг 6-дақиқасида чамаси 35 метрлар узоқликдан ўз ҳамшаҳарлари дарвозасини забт этганди. Шунингдек, қаҳрамонимиз Икер Касильяс («Реал»), Жон Терри («Челси»), Неманья Видич («МЮ»), Патрис Эвра («МЮ»), Алвеш («Барселона»), Хави («Барселона»), Андрес Иньеста («Барселона»), Стивен Жеррард («Ливерпуль»), Лионель Месси («Барселона»), Фернандо Торрес («Ливерпуль») лар бирга 2009 йилнинг рамзий терма жамоасидан жой олди.

Тошкент халқаро аэропортида Португалия терма жамоаси ҳамда Мадриднинг «Реал» клуби суперюлдузини Ўзбекистон футбол федерацияси мутасаддилари, «Бунёдкор» футбол клуби аъзолари, кенг футбол жамоатчилиги ҳамда кўп сонли ишқибозлар тантанали равишда кутиб олишди. Тантанали кутиб олиш маросимидан сўнг португалиялик юлдуз ўзи учун ажратиб қўйилган «Интерконтиненталь» меҳмонхонасига йўл олди. Меҳмонхона олдида 24 ёшли иқтидор эгасини юзлаб ишқибозлар қарши олишди. Роналду дастхатлар тарқатиш билан бирга ашаддий мухлисларидан эсдалик совғаларини ҳам қабул қилиб олди. Соат 11 ларда Ўзбекистон футбол федерациясида федерация президенти Мираброр Усмонов ва Криштиану Роналду ўртасида учрашув бўлиб ўтди. Учрашув чоғида Усмонов Криштиану Роналду каби дунё юлдузларининг юртимизга ташрифи Ўзбекистонда миллионлар ўйинининг янада оммалашиши ва ривожига катта туртки бўлишини таъкидлади. «Бугун юртимизда ўзгача кун, катта байрам. Криштиану Роналдунинг Тошкентга келишини эшитгандан бери футбол ишқибозлари қачон 22 декабрь келар экан, деб кун санашаёган эди. Дарҳақиқат, сизнинг Ўзбекистонга ташрифингиз тарихий воқеа бўлди ва бу нарса юртимизда футболга бўлган муҳаббатни ошишига ҳамда уни янада оммалашишига сабаб бўлиши шубҳасиз. Сизга шахсан ўз номимдан, қолаверса, бутун футбол жамоатчилиги номидан чексиз миннатдорчилик изҳор қиламан. Умид қиламанки, келажакда яна учрашиш насиб қилади», - деди М.Усмонов.

Ўз ўрнида Криштиану ҳам Ўзбекистонда бўлиб турганидан хурсанд эканлигини билдириб, ўзбек футболига омад тилади. Шундан кейин, ЎФФ президенти футболчига эсдалик совғалари, жумладан ўзбек миллий чопонини совға қилди. Роналду федерация қошида ташкил қилинган, ўзбек футболининг тарихини акс эттирувчи музей билан яқиндан танишди.

Режага кўра, соат 12:00да «Жар» стадионининг анжуманлар залида Криштиану Роналду иштирокида журналистлар учун матбуот анжумани ўтказилиши лозим эди. Бироқ кун тартибига бироз ўзгартириш киритилиб, матбуот анжумани белгиланган вақтдан 2 соат кейин, аниқроғи, соат 14:00да бошланди. Ушбу ўзгариш сабаб савол-жавоб қисқагина бўлиб ўтди. 5-6 нафаргина ҳамкасбларимизга (асосан хориж матбуотида қалам тебратувчи, - муал.) Роналдуга савол бериш насиб қилди, холос. Очиғи, бундай бўлишини кутмагандик.

- Ўзбекистонга ташрифингиздан кўзланган асосий мақсад нима?

- Ўзбекистонда эканлигимдан бағоят хурсандман. Биринчи галда таклиф қилишгани учун ўз миннатдорчилигимни билдираман. Келишимдан кўзланган асосий мақсад Ўзбекистонда футболни янада оммалашишига ҳисса қўшиш, ўсиб келаётган ёш футболчиларнинг миллионлар ўйинига бўлган қизиқишини янада оширишга ёрдам беришдан иборат. «Ўзбекистон маданияти ва санъати форуми» жамғармасининг «Ёш футболчиларни қўллаб-қувватлаш дастури» лойиҳасининг ҳаётга татбиқ этилишига ўз ҳиссамни қўшмоқчиман. Юртингиз футболи ҳақида тажрибали мутахассис Луиз Фелипе Сколари орқали маълумотларга эга эдим. Таклиф бўлганда, бунга бажонидил рози бўлдим.

- Сизни Тошкентда кўриб турганимиздан хурсандмиз. Хуш келибсиз. Кеча Швейцариядаги гала-тадбирда иштирок этдингиз, мана бугун Тошкентдасиз. Бундай зич иш кун тартиби сиз учун одатий ҳолга айланганми?

- Албатта. Испания чемпионатида 3 январгача таътил эълон қилинган. Оралиқдаги қисқа бўш вақт орасида мана шундай хайрия акцияларида иштирок этаман. Сизлар билан кўришиб турганимдан бағоят хурсандман. Тўғри, ташрифим узоқ вақтга мўлжалланмаган. Бироқ шу қисқа фурсат ичида ҳам ўз профессионаллик бурчимни адо этишга ҳаракат қиламан. Ўйлайманки, Ўзбекистонга ҳали қайтаман. Ишонтириб айтаманки, кейинги ташрифим узоқроқ муддатга мўлжалланган бўлади.

- Фаолиятингиз давомида Туркия клубларидан таклиф олганмисиз? Агар шундай имконият бўлса, Туркиянинг қайси клубини танлаган бўлардингиз?

- Ҳеч қандай таклиф олмаганман. Лекин футболда олдиндан бир нарса деб бўлмайди. Кутилмаган воқеалар кўп бўлиб туради.

- Сўнгги йилларда Ўзбекистонга жаҳон футболи юлдузларининг келиб, маҳаллий ёшларга мастер-класс ўтиши анъанага айланиб қолди. Сиздан аввал Лионель Месси келганди. Бўлажак мастер-классларга сиз айнан кимни тавсия қилган бўлардингиз?

- Ўзимни тавсия қилган бўлардим (кулади). Бу албатта, ҳазил. Мен ҳеч кимни тавсия қилолмайман. Лекин сизга шуни аниқ айтишим мумкинки, мен бугун ишқибозларга ва ёш футболчиларга ўзимнинг энг чиройли кўргазмали чиқишларимни намойиш этаман. Ёшларга намуна бўладиган машқлар кўрсатишимдан асосий мақсад эса, ҳар бир футболчи болалигидан энг кучли ўйинчи бўлишга ишонишини ва шунга интилишини хоҳлайман. Ҳар бир болакай бу гапни ўзига доимий шиор қилиб олиши лозим.

- Сиз ҳамиша жаҳон аҳлининг диққат марказидасиз. Турли шоу тадбирларда иштирок этасиз. Улар орасида маданий тадбирларга кўп вақт ажратасиз. Айтингчи, сизга кўпроқ қайси тадбирларда қатнашиш маъқул келади? Футболдами ёки...?

- Албатта, мен, биринчи галда, профессионал футболчиман. Шу боисдан, биринчи галда футболни танлайман. Футбол ҳаётимнинг мазмунига айланган. Ўзимни футболсиз бир кун ҳам тасаввур қила олмайман.

- Матбуотда сизга Россиядан, аниқроғи Москванинг «Динамо» клубидан таклиф тушганлиги тўғрисида хабар тарқалганди. У ерда Данни, Манише каби ҳам-юртларингиз ҳам тўп суришди. Бу маълумот қанчалик ҳақиқатга яқин?

- Бундан умуман хабарим йўқ. Аммо юқорида айтиб ўтганимдек, футболда олдиндан аниқ бир нарса дейиш қийин. Эртага сизни нималар кутиб турганини билиш мушкул. Бунинг иложи ҳам йўқ.

- Келажакда ёш футболчиларни қўллаб-қувватлаш учун мўлжалланган шахсий хайрия марказингизни очишни режалаштирганмисиз?

- Мен ҳамиша бундай хайрия акцияларининг тарафдори бўлиб келганман. Вақтим бўлди дегунча, ёш футболчилар учун ташкил этиладиган тадбирларда иштирок этаман. Лекин вақтим жуда тиғиз. Испания чемпионати, кубок ўйинлари, Чемпионлар Лигаси учрашувлари, терма жамоа учун ўйинлар... Шу боисдан ҳозир бундай марказни ташкил қилишга фурсат йўқ. Орада бироз танаффус юзага келганидан унумли фойдаланган ҳолда Тошкентга келдим ва бу ердаги ёш иқтидорлар билан учрашиш насиб қилди.

Шундан сўнг барчанинг нигоҳи майдонга қаратилди. Очиғи, «Жар» стадиони бунёд этилганидан буён бу даражада ишқибозлар билан тўлиб тошмаганди. Ҳатто миллий терма жамоамизнинг ўйинларига бунчалик кўп мухлис келмаганди. Обрўни қаранг. Аслида 8 мингдан озгина ошиқроқ томошабинга мўлжалланган стадионга 15 мингга яқин ишқибоз киришга муваффақ бўлди. 10 мингга яқини ичкарига кира олмай, стадион ташқарисида қолиб кетди. Биз журналистлар ҳам аранг кириб олдик. Тўғрида, Роналду ҳар доим ҳам Тошкентга келавермайдику! Шу пайтгача фақат ойнаи жаҳон орқали ўйинларини кузатган мухлислар ўз суюклиларини жонли тарзда кўриш имконияти юзага келганда, уни қўлдан чиқаришармиди? Ушбу қувончли онлар ўзбекистонлик футбол мухлисларига «Ўзбекистон маданияти ва санъати форуми» жамғармасининг «Ёш футболчиларни қўллаб-қувватлаш дастури» доирасида тақдим этилди. Бежизга ўзбекистонлик футбол ишқибозлари демаяпмиз. Сабаби, Роналдуни кўриш учун мамлакатимизнинг турли бурчакларидан мухлислар етиб келишганди.

Майдонга кун қаҳрамони Криштиану Роналду чиқиб келганда «Жар» ларзага келди. Анчадан бери ишқибозларнинг бундай қўллаб-қувватлаши ва ҳайқириғини эшитмаган эдик. Бунга жавобан, португалиялик меҳмон тўп билан муомаласини йиғилганларга намойиш қилди. У ўз финтларини кўрсатаётганда ёлғиз эмасди. Унга «Бунёдкор» футбол академияси тарбияланувчиси, 12 ёшли Шоҳжаҳон Ҳасанов ҳамроҳлик қилди. Жаҳон футболи юлдузидан қолишмасликка ҳаракат қилган Шоҳжаҳон ишқибозларнинг олқишига сазовор бўлди. Қайтанга, Роналду ёш ҳамкасби олдида бироз ҳаяжонланиб қолди.

Шундан сўнг, «Бунёдкор» футбол академиясининг 1995 ва 1996 йилларда туғилган футболчилардан иборат жамоалари ўзаро баҳслашишди. Криштиану иккала жамоа сафида бир бўлимдан ҳаракат қилди. Сайёрамизнинг 2008 йилдаги энг яхши футболчиси ижросидаги ҳар бир чиройли ҳаракат гулдурос қарсаклар билан олқишлаб турилди.

Бир сўз билан айтганда, бундай шоуларнинг доимий тарзда ўтказилиб туриши фойдадан холи бўлмайди. Келажагимиз эгалари сифатида эътироф этиладиган ёшларимиз келаётган ҳар бир юлдуз каби машҳур бўлишга интилишади. Қалбларида футболга нисбатан пайдо бўлган учқун бунинг таъсирида алангага айланади. Кейин бу алангани ўчиришга уриниб кўрингчи, қўлингиздан келармикан? Албатта, йўқ.

Хулоса қиладиган бўлсак, Криштиану Роналдунинг Ўзбекистонда меҳмон бўлиши якунланиб бораётган ҳафтанинг муҳим воқейлиги сифатида эътироф этилди. Кўча-кўйда, шаҳар транспортида, ишхонада, хуллас, қандай даврада бўлманг, бир мавзу. Ҳамманинг оғзида Роналду. Бевосита бир майдонда жаҳон футбол юлдузи билан бирга тўп тепиш бахтига муяссар бўлган ёшларимизнинг яқин келажакда Роналду каби истеъдодли футболчи бўлиб етишишларига умид қилиб қоламиз. Учрашув бу ёшларнинг қалбида бир умрга муҳрлангани ҳам айни ҳақиқат. Бир сўз билан айтганда, «қироллик» клубининг «қирол» юлдузи қисқа муддат Тошкентда меҳмон бўлган бўлсада, ўзбек футбол ишқибозлари қалбига олам-олам қувонч улашди. Эслатиб ўтамиз, Криштиану Роналду 23 декабрь куни эрта тонгда Португалия пойтахти Лиссабон шаҳрига учиб кетди.

Манба: http://interfutbol.uz/component/content/article/1-intervyular/5839---l--r?tmpl=component&print=1&page=